500呎嘅單位想收納空間最大化，一幅過嘅大型連牆櫃就最啱喇。由入門口嘅鞋櫃一路延伸到客廳嘅電視櫃，整體設計非常連貫。鞋櫃底做咗懸空設計，方便擺放平時著開嘅拖鞋，加埋滲燈效果，空間感即刻提升。中間部分做咗中空位，可以放鎖匙同埋裝飾品。電視櫃部分就用咗簡約嘅木紋夾埋白色面板，感覺好清新。上層同側邊全部都係隱藏式收納空間，採用無把手設計，撳一撳就開得，外觀乾淨俐落。入面層板可以自由調節高度，無論係吸塵機定係大型行李箱都絕對收得落，完美解決一家大細嘅收納煩惱。