12張圖話你知細單位點食盡每寸位

影片介紹

香港單位細，最蝕底嗰啲位其實唔係間隔，係啲「唔知點用」嘅零碎位：走廊淨係攞嚟行、廚房細到無位擺野、天花上面一大截就咁吊喺度。今次呢個現代簡約個案，索性由玄關開始逐寸位度過先做，成間屋每個角落都有嘢收。

玄關吊櫃同地櫃中間留返個中空位，鎖匙、銀包返到屋企順手一放；下面連埋換鞋凳，坐低著鞋唔使彎腰。地櫃懸空，櫃底藏咗燈帶，柔光滲落地下，夜晚返嚟唔使開大燈都見到路。

好多人以為走廊淨係攞嚟行，其實師傅上門度過先知兩邊做唔做到櫃。呢度做咗到頂高櫃，深木門板配奶白櫃身，望落有層次又唔覺窄。

電視櫃做成一體式廳櫃，電線全部收埋唔見晒；成幅牆統一咗木色做底，梳化想跳翠綠色都夾得返，唔怕撞。

設計師沿住廚櫃邊位擠出一張細餐枱，日常兩個人食飯夠晒；廚櫃用木紋加奶白，層板底加燈帶，煮嘢食嗰陣枱面睇得清楚啲。

衣櫃做到頂，食盡垂直空間，直達天花都唔妨礙採光，換季衣物、被褥、行李箱全部有位擺；床底再暗藏一排櫃桶，大件雜物收晒，房間keep住整潔。

浴室櫃身懸空離地，櫃底唔積濕氣，用埋防潮物料做，啱晒香港天氣；鏡櫃收埋樽樽罐罐，枱面乾淨返晒，原來浴室都影到相。