【C字櫃設計】一個櫃有幾多用法？慳位收納一篇睇清

一般香港家庭單位都唔大，儲物空間同收納技巧便變得好重要，想用盡每一吋空間？簡單一個C字櫃便幫到你！今次我哋為你整合了C字櫃多個用途，同埋唔同嘅設計範例。

C字櫃係咩？

C字櫃，又名中空櫃，顧名思義，係用C字形狀設計嘅儲物櫃，通常會分成上下兩個部分，中間保留開口位置作枱面、用嚟擺日用品，係屋企唔少得嘅大型傢俬。

C字櫃嘅兩大好處

儲物空間大

C字櫃一般都會由地面直立至天花板，你仲可以訂造貼合牆壁尺寸大小嘅櫃面，用盡整個樓底空間來儲物收納。

多用途配搭

上面提及過C字櫃係由唔同嘅部分組成嘅組合櫃，只要配搭數個唔同嘅櫃子及配件，就可以設計出多款唔同用途嘅C字櫃。例如你可以喺玄關櫃嘅背板加上鏡子或燈，方便出入時整理儀容；或者將地櫃懸空吊起數厘米，作擺放家居鞋、拖鞋嘅用途。

好少人留意到嘅儲物空間：將地櫃懸空可以擺放拖鞋！

7種常見嘅C字櫃設計

根據C字櫃嘅尺寸、擺放位置同配件唔同，相應嘅用途亦唔同，如果你唔知自己嘅單位適合邊種C字櫃，或者點樣嘅配搭才最適合自己所需，不妨睇下下列七個唔同嘅設計範例。

01鞋櫃

C字櫃如果係放喺門口或玄關位置，通常都係用嚟做鞋櫃用，地櫃嘅儲物間隔會多啲，容易擺放多啲嘅鞋。你仲可以喺C字櫃旁邊保留一點空間擺放換鞋櫃或換鞋櫈，方便出入時換鞋。

02行動櫃

行動櫃通常配搭鞋櫃一齊放喺門口，等我哋出門時可以很快速地帶齊手袋、銀包、外套、雨傘等物品。例如，可以喺C字櫃入面多做幾個櫃桶，方便用嚟放手袋同銀包等物品。亦可以加上鏡面，枱面擺放飾物架，用嚟做擺放戒指、耳環，甚至鎖匙等小配件。有些C字櫃加設了一格特別高身、窄身嘅儲存格，入面可以加一條掛通，用嚟掛放長遮。C字櫃嘅側面仲可以裝一排衣物掛勾，用嚟掛放雨衣、外套。

03裝飾櫃

C字櫃亦能有著裝飾櫃嘅功能，只要將頂部嘅櫃門換上玻璃門板，再喺入面裝上射燈，C字櫃就可以搖身一變成為裝飾櫃、展示櫃了。只要有一個合適嘅C字櫃，收納得宜，你就可以擺放及展示自己喜愛嘅公仔或模型高達等收藏品，又不怕會阻礙日常活動空間。

換上玻璃、裝上射燈，簡簡單單就可以擁有一個展示櫃。

04雜物櫃／儲物櫃

C字櫃嘅設計，通常係下半部分係鞋櫃，而上半部分係儲物櫃/雜物櫃。櫃內有多塊活動層板，可以上下調節高度。將唔同嘅物件通通收納。

05衣櫃

如果想將C字櫃放喺睡房，或者你嘅單位係套房、工作室嘅設計，可以將C字櫃嘅深度加深至500mm深，加深了嘅C字櫃就可以發揮衣櫃嘅功能，擴充衣物儲存空間。加深了嘅C字櫃比傳統衣櫃嘅用途多啲，不但有唔同隔間，又可以保留開口位置擺放帽、眼鏡等小物。

喺C字櫃開口位置擺放小物仲可以令空間增加個人特色。

06廚櫃

將C字櫃放喺廚房，可以充當廚櫃用，比起吊櫃，C字櫃嘅儲物空間明顯更勝一籌。如果放喺開放式廚房，能發揮更大用途，因為香港嘅開放式廚房一般比較細，枱面空間有限，放得了電熱水壺就沒位放電飯煲，呢個嗰陣C字櫃嘅枱面就可以解決呢個問題，擴充廚櫃枱面嘅空間，用嚟擺放廚房常用嘅電器又或用嚟做臨時擺放食物。

07餐枱櫃

C字櫃亦可以作為餐枱櫃，只要喺C字櫃收埋一張伸縮嘅變形餐枱，就可以喺需要時拉出來，輕鬆變出一張4人或6人嘅餐枱。

C字餐枱櫃特別適合冇飯廳或廳中空間不足嘅單位使用。

C字櫃可以按儲物、展示同用餐用途揀配搭，例如功能強大的C字櫃、圓角玄關櫃延續拱形光景｜奶油色訂造傢俬、一個簡單的廳櫃、衣帽間搬入睡房?頂天衣櫃連梳妝台、電視櫃訂造慳位同C字櫃+伸縮枱一櫃多用。櫃形同中空位置要配合房間間格、取放物件同活動空間。